छापा संस्करण

ताप्लेजुङ — फोहोरमैला व्यवस्थापन र स्वच्छता कायम राख्न ताप्लेजुङको फुङलिङ नगरपालिका वडा नं १० ले पाथीभरा क्षेत्रका होटल र पसल सञ्चालकलाई डस्टबिन वितरण गरेको छ। यस योजनाअन्तर्गत काफ्लेपाटीदेखि ठूलो फेदीसम्मका सबै व्यवसायीलाई एक/एक थान डस्टबिन प्रदान गरिएको हो।

फुङलिङ नगरपालिका वडा नं १० का अध्यक्ष सन्तोष लिम्बूका अनुसार, पर्यटकीय स्थल पाथीभरा क्षेत्रमा बढ्दो फोहोर र यसको व्यवस्थापनको चुनौतीलाई मध्यनजर गर्दै डस्टबिन वितरण गरिएको हो। "पाथीभरा क्षेत्र धार्मिक र पर्यटकीय महत्त्व बोकेको स्थान भएकाले यहाँ सरसफाइको विशेष ध्यान दिनुपर्छ। यसैले हामीले सबै व्यवसायीलाई फोहोर सङ्कलन गर्न डस्टबिन प्रदान गरेका हौँ," अध्यक्ष लिम्बूले बताए।

कार्यक्रममा फुङलिङ नगरपालिकाका उपप्रमुख भीमादेवी ओझाको समेत उपस्थिति रहेको थियो। उपप्रमुख ओझाले यस कदमले क्षेत्रको सफाइ व्यवस्थापनमा सुधार आउने र पर्यटकलाई सफा वातावरण उपलब्ध गराउन सहयोग पुग्ने बताइन्। "यो सानो तर महत्त्वपूर्ण कदम हो जसले पाथीभरा क्षेत्रको सौन्दर्य र पर्यटकीय अनुभवमा सुधार ल्याउन मद्दत गर्नेछ," उपप्रमुख ओझाले भनिन्।

वडा कार्यालयका अनुसार, डस्टबिन वितरणको मुख्य उद्देश्य फोहोरको उचित व्यवस्थापन र विसर्जन सुनिश्चित गर्नु हो। पाथीभरा क्षेत्रमा हरेक वर्ष हजारौँ तीर्थयात्री र पर्यटकहरू आउने भएकाले फोहोरको उचित व्यवस्थापन चुनौतीपूर्ण बन्दै आएको छ। यस योजनाले फोहोर सङ्कलन प्रणालीलाई व्यवस्थित बनाउन सहयोग पुग्ने जनाइएको छ।

होटल व्यवसायीहरू पनि यो सहयोगबाट खुसी देखिएका छन्। काफ्लेपाटीस्थित एक होटल सञ्चालकले भने, "डस्टबिन पाएपछि अब फोहोर व्यवस्थापनमा सहजता हुने अपेक्षा गरेका छौँ। यसले हाम्रो व्यवसायमा सकारात्मक असर पार्नेछ र पर्यटकलाई सफा र आकर्षक वातावरण प्रदान गर्न सहयोग गर्नेछ।"

फुङलिङ नगरपालिका वडा नं १० को यस कदमलाई स्थानीयहरूले स्वागत गरेका छन्। यो कदमले स्थानीय र पर्यटकको स्वच्छता सचेतना बढाउनका साथै वातावरणीय संरक्षणमा पनि योगदान पुर्‍याउने विश्वास गरिएको छ।

तस्बिरः सन्तोष लिम्बू