छापा संस्करण

ताप्लेजुङको सिरिजंघा गाउँपालिका—३ का वडाध्यक्ष दिलप्रसाद बोखिमले शारीरिक अस्वस्थता र वैदेशिक रोजगारीका कारण आफ्नो पदबाट राजीनामा दिएका छन् । बैदेशिक रोजगारीमा हङकङ रहेको र वडा कार्यालयमा उपस्थित हुन नसकेकाले राजीनामा दिएको हो ।
। विगत ११ महिनादेखि हङकङमा रहेका बोखिमले गाउँपालिकाको अध्यक्षमार्फत जिल्ला निर्वाचन कार्यालय ताप्लेजुङलाई राजीनामा पत्र पठाएका हुन ्। असोज १८ गतेदेखि लागू हुने गरी उहाँले आफ्नो राजीनामा पेश गरेका छन् ।
बोखिमले शारीरिक अस्वस्थता र पारिवारिक कारणले विदेशबाट फर्कन नसक्ने जानकारी गराउँदै, आफ्नो जिम्मेवारी कार्यवाहक वडाध्यक्षलाई सुम्पिएको बताएका छन् । २०८० साल कात्तिक २४ गतेदेखि वडामा अनुपस्थित रहेका उनले जनताको सेवा गर्न नसकेकोमा दुःख प्रकट गरेका छन् ।
स्थानीय जनताले बोखिमको अनुपस्थितिका कारण विकास र प्रशासनिक काममा बाधा उत्पन्न भएको भन्दै उहाँमाथि कारबाहीको माग गर्दै गाउँपालिका अध्यक्ष लालकृष्ण चौहानलाई ज्ञापनपत्र बुझाएका थिए । सात जना स्थानीयले वडाध्यक्षलाई अनिवार्य रुपमा जनताबीच उपस्थित भएर काम गर्न वा राजीनामा दिएर नयाँ नेतृत्वका लागि मार्ग खुला गर्न सुझाव दिएका थिए ।
बोखिमको अनुपस्थितिमा कार्यवाहक वडाध्यक्षका रूपमा वडा सदस्य अम्बि साउदेनले काम गर्दै आएका छन् । स्थानीय नागरिकले उहाँबाट केही विकास कार्य भए पनि स्थायी वडाध्यक्षको अभावमा दीर्घकालीन योजना र समस्याहरु समाधान हुन नसकेको गुनासो गरेका छन् ।…