छापा संस्करण

चौथो अन्तराष्ट्रिय ताप्लेजुङ गोल्डकपको उपाधि लगातार दोस्रो वर्ष सलहेस युवा क्लब सिराहाले जितेको छ । भारी वर्षा र हिलाम्मे मैदानका बीच पाँचथरको फिदिम स्पोर्टिङ क्लबलाई ३–० ले पराजित गर्दै सलहेसले उपाधि रक्षा गरेको हो ।

सलहेसका लागि फाइनलको मध्यन्तर अघि भने दुवै टोलीले बराबरी खेलेका थिए । सलहेसले तेस्रो ताप्लेजुङ गोल्डकपको उपाधि समेत चुमेको थियो । दोस्रो ताप्लेजुङ गोल्डकपबाट सहभागी बन्न थालेको सलहेस यो सहित लगातार विजेता बन्दै छ भने दोस्रो संस्करणमा उपविजेता बनेको थियो । सलहेसविरुद्ध जित निकाल्न नसकेको फिदिमले ताप्लेजुङ गोल्डकप जितेर इतिहास रच्ने मौका गुमाएको छ । फिदिम ताप्लेजुङ गोल्डकपमा भने पहिलोपटक फाइनलमा पुगेको हो । प्रतियोगिताको विजेता बनेको सलहेसले नगद ७ लाख ७ हजार ७ सय ७३ रुपैयाँ पाएको छ भने उपविजेता बनेको फिदिमले ३ लाख ३ हजार ३ सय ३३ रुपैयाँ पाएको छ ।
आयोजक समितिका अध्यक्ष सागर मादेनका अनुसार भारतको जर्जियन युनाइटेड फुटबल क्लब कालिङ्पोङलाई २–० गोलअन्तरले हराएर सलहेस युव क्लब फाइनलमा पुगेको थिए । यस्तै सेमिफाइनलमा झापा ११ फुटबल क्लबलाई १–० गोलअन्तरले हराएर फिदिम स्पोर्टिङ क्लब फाइनलमा पुगेको थिए ।
भदौ १२ गतेदेखि सुरु भएको प्रतियोगितामा आठ टोली सहभागी भएका थिए । फाइनलमा पुगेका सलहेस र फिदिमबाहेक आयोजक ताप्लेजुङ ११, नेपाल पुसिल क्लब, सातदोटबाटो फुटबल क्लब ललितपुर सहभागी भएका थिए । त्यस्तै चित्लाङ फुटबल क्लब काठमाडौँ, भारतको जर्जियन युनाइटेड फुटबल क्लब र झापा ११ फुटबल क्लबले प्रतियोगितामा सहभागिता जनाएका थिए ।..