छापा संस्करण

सपना जस्तै लाग्ने हिमाली यात्राको सुरु भयो ताप्लेजुङको सदरमुकाम फुङ्लिङबाट । करिब आठ घण्टाको गाडी यात्रा पछि हामी याम्फुदिन पुग्यौँ—जहाँको शान्त वातावरण र पहाडी जीवनशैलीले मन शान्त बनाइदियो । तिनतले झुपडी, उकाली–ओरालीका गोरेटो र गर्मी चियाको स्वादसँगै हामी यात्राको दोस्रो दिन नयाँ झोरेनी बासतर्फ लाग्यौँ ।

नयाँ झोरेनी—जहाँबाट साहसिक कञ्चनजंघा पदमार्गको वास्तविक सुरुवात हुन्छ । पदमार्गले हिमालको काख समाउँदै अगाडि बढ्छ । यहाँदेखि देखिने दृश्यहरू आँखाले मात्र होइन, आत्माले महसुस गर्नुपर्ने खालका थियो । हिमालहरूसँग संवाद गर्न मिल्ने जस्तो लाग्थ्यो । वरिपरि हरियाली जंगल, धुपी र सुनपातीको सुगन्ध, चीमल र गुराँसका फूलहरू—सबैले मनलाई थप आनन्दित बनाइरहेका थियो ।

चराचुरुङ्गीको चिरबिर आवाजले हामीलाई अगाडि बढ्न हौस्याइरहेको थियो । बाटो कतै फराकिलो फाँट हुँदै जान्थ्यो त कतै घनाजंगल र भिरालो ओढार पार गरेर । कतिबेला घाम लाग्थ्यो, अनि आकस्मिक हिउँले हामीलाई ढाके जस्तो लाग्थ्यो । उच्च हिमाली क्षेत्र भएकाले मौसमको पूर्वानुमान गर्नु कठिन थियो, तर यही अप्रत्याशितता नै यात्रा झन रोमाञ्चक बनाइरहेको थियो ।

हिउँ परेको दिनको अनुभव अझै ताजा छ। सेताम्मे हिउँमा रमाउँदै हामी अघि बढ्यौँ । साथीहरूबीच कहिले प्रतिस्पर्धा, कहिले हाँसो ठट्टा, कहिले थकान र कहिले मौनता—यात्रा जीवन जस्तै लागिरहेको थियो । कसैले गति लियो, कसैले विश्राम ग¥यो । कोही पछि परे, कोही नयाँ साथी बने। यस्ता यात्राले केवल प्रकृति मात्र होइन, सम्बन्धहरू पनि बनाउँछ र परीक्षण गर्छ ।

करीब ४० किलोमिटर लामो यो साहसिक पदमार्गले हामीलाई प्रकृतिको अँगालोमा पुर्यायो । विशेषगरी नयाँ पदमार्ग खुलेपछि यात्रा अझ सहज र व्यवस्थित भएको अनुभव भयो । नयाँ झोरेनीबाट सुरु भएर आम्जी खोला, तुप्लुङ, दुन्दुडाँडा, नगर्चा हुँदै चेराम र अन्ततः ओक्ताङ बेशक्याम्प पुग्ने यो मार्ग साँच्चिकै अद्वितीय छ । हालसम्म २२ किलोमिटर पदमार्ग निर्माण भइसकेको छ भने दुई वटा झोलुङ्गे पुल निर्माणाधीन अवस्थामा छन् ।

यस पदमार्ग निर्माणमा तीन करोड ५० लाख रुपैयाँको लगानी पर्यटन, संस्कृति तथा नागरिक उड्डयन मन्त्रालयबाट भएको छ भने बाँकी ३० प्रतिशत स्थानीय गाउँपालिकाले बेहोरेको छ । स्थानीय र केन्द्र सरकारको सहकार्यमा निर्माण भएको यो पदमार्गले साहसिक पर्यटनको नयाँ ढोका खोलेको छ ।

मनमा उत्साहको तरंग दौडियो । अगाडि अटल भएर उभिएको हिमालले हामीलाई स्वागत गरिरहेको थियो । यो दृश्य आँखाले मात्र होइन, हृदयले टिप्नुपर्ने क्षण थियो । त्यहाँबाट देखिने हिमशृङ्खलाको विशालता र सौन्दर्य शब्दमा वर्णन गर्न असम्भव छ ।

यात्रा केवल पदयात्रा थिएन—यो आत्मा र प्रकृतिबीचको गहिरो संवाद थियो । साहसिक यात्राको नाममा हामीले जुन भावना र ऊर्जा प्राप्त ग¥यौँ, त्यो जीवनभर साथ रहनेछ । कञ्चनजंघा पदमार्गले साहसिकतासँगै स्थानीय संस्कृति, प्रकृति र पर्यटनको सम्भावनालाई पनि उजागर गरिदिएको छ ।
साँच्चिकै भन्नुपर्दा, यस्तो यात्रा एक पटक मात्रको अनुभव भएर सीमित रहनु हुँदैन । यो यात्रा पटक–पटक दोहोरिनुपर्ने सौन्दर्य हो, जहाँ हरेक चोटि नयाँ अनुभूति र नयाँ प्रेरणा प्राप्त हुन्छ ।…