आ हा ! मन लोभ्याउँने सिङजेमा
Phaktanglung Darpan
मंसिर ३ गते २०८०
11:15 am
फक्ताङलुङ दर्पण
विवश केदेम/फक्ताङलुङ
आकाशमा बादल मडारिएसँगै छिनमा नीलो, छिनमै कालो र छिनमै सिन्दुरे बन्ने सिङजेमा ताल बिहानदेखि बेलुकिसम्म फरक–फरक रंगमा सजिन्छ।
आकाश नीलो हुँदा तालको पानी पनि नीलो देखिन्छ। बादल मडारिँदा ताल पनि कालै बन्छ ।
सूर्यास्तका बेला रंगीन रुप हुन्छ । आकाशको रंग अनुसार तालले आफ्नो रुप बदलिरहन्छ ।
हिमालको काखमा ताल वरिपरि धेरै भाग चट्टानले घेरेको छ । ताललको अवलोक गर्न पुग्ने जो कोही एकै छिन कोही मन्त्रमुक्त हुन्छ । आँखा नझिम्क्याई जति हेरे पनि आँखा थाक्दैनन् । ताललाई छोडेर फर्कन मन लाग्दैन ।
ताप्लेजुङको फक्ताङलुङ गाँउपालिका—७ ओलाङचुङगोला स्थित समुद्रि सतह देखि चार हजार ७०० मिटर उचाईमा रहेको सिङजेमा ताल घुम्ने आन्तरिक पर्यटकको संख्या बढिरहेको छ ।
विगतका वर्षहरुमा सिङजेमा क्षेत्रमा घुम्न आउने पर्यटक खासै नभेटिए पनि अघिल्लो वर्षबाट आन्तरिक पर्यटक बढिरहेका छन ।
सिङजेमा छेर क्षेत्रमा विगत लामो समय देखि गोठ सञ्चालन गरेर वसेका पेम्वा शेर्पाका अनुसार यसै वर्षमात्र २ सय वढि आन्तरिक पर्यटकले यस क्षेत्रको यात्रा गरेको बताउनुहुन्छ ।
सिङजेमा क्षेत्रको प्रचार प्रसार भए सँगै यश क्षेत्रको बाटो तथा ताल वरिपरि परिक्रमा गर्ने ठाँउको मर्मत गर्न आवश्यक रहेकोले तत्काल वडा कार्यलयले मर्मत गर्ने योजना रहेको वडा अध्यक्ष छेतेन शेर्पा बताउनुहुन्छ ।
त्यसै गरि ओेलाङचुङगोला क्षेत्रमा दर्जनौ पोखरि तथा तालहरु रहेकोले प्रचार प्रसारलाई व्यापक बनाएर आन्तरिक तथा बाह्य पर्यटक भित्र्याई यस क्षेत्रको आर्थिक क्षेत्र समेत वृद्धि गर्न सकिने भएकोले प्रचार सँगै यस क्षेत्रमा घुम्न आउने पर्यटकलाई सहज बनाउन भौतिक निर्माणलाई प्राथमिकता दिने फक्ताङलुङ गाउँपालिका अध्यक्ष राजन लिम्बु ९मुक्तिm० बताउनुहुन्छ ।
यश क्षेत्रमा सिङजेमा ताल बाहेक ३०० देखि ४०० मिटर माथि पहाड चढे पछि दर्जनौ आकर्षक ताल तथा पोखरिहरुको समेत दृष्यावलोकन गर्न सकिन्छ ।
उतर पुर्वि क्षेत्रमा साम्दो पोखरि रहेको छ । यो पोखरि एकै ठाउँमा दुईवटा सँगै रहेको र हेर्दा निकै आकर्षक देखिन्छ ।
त्यसै गरि उतर पश्चिम क्षेत्रमा एकै ठाउँ मा चार वटा पोखरि एकै ठाउँमा रहेको सेप्चो ईम्जो पोखरि समेत रहेको छ ।
त्यसैले यस क्षेत्रलाई पर्यटकहरुको हव बनाउन सकिने भएकोले विशेष योजना बनाएर अघि बढ्ने योजना रहेको अध्यक्ष लिम्बू बताउनु हुन्छ ।
सिङजेमा पुग्नका लागि ताप्लेजुङको सदरमुकाम फुङ्लिङ देखि गाडीमा चडेर इला डाँडा सम्म पुग्न सकिन्छ ।
इला डाँडामा विहानको खाना खाएर बेलुका ओलाङचुङगोला बास पुग्न सकिन्छ ।
ओलाङचुङगोला देखि सिङजेमा ताल पुगेर गोला सम्म फर्कन सकिन्छ । तर विस्तारै जाने हो भने छेर भन्ने ठाउँमा याक गोठहरु छन ।
गोठमा बसेर एक दिन आनन्दले सिङजेमा क्षेत्रको प्राकृतिक सुन्दरताको अवलोकन गर्न सकिन्छ ।
तस्बिरः विवश केदम, फक्ताङलुङ दर्पण
फक्ताङलुङ्ग दर्पण पढ्नुभएकोमा धन्यवाद यसलाई जीवित राख्नकोलागि तपाइँको आर्थिक सहयोग महत्वपूर्ण हुन्छ।
यहाँहरुबाट प्रप्त रकमलाई सम्बन्धित क्षेत्रमा लगानी गर्ने प्रतिबद्धता जाहेर गर्दछौं।
मा Scan गर्नुहोला
