छापा संस्करण

परम्परागत रुपमा गरिँदै आएको रोपाइँ जात्रा शुक्रबार ताप्लेजुङ सदरमुकाम फुङ्लिङमा भव्य रुपमा मनाइएको छ । युवापुस्तामाँझ संस्कृति हस्तान्तरण गर्ने र परम्परालाई निरन्तरता दिने उद्देश्यले जात्रा निकालिएको हो ।

गाउमा रोपाइँ सकेर बसेका किसानलाई सहर निम्त्याउने र मनोरञ्जन प्रदान गर्ने उद्देश्यले यो पर्व मनाउने गरिएको नेपाल भाषा तथा सांस्कृतिक समाजका अध्यक्ष शंकर श्रेष्ठको भनाइ छ ।

उहाँका अनुसार सबै जातजाति भाषा–भाषीलाई समेटेर पर्व मनाउने गरिएको छ । समाजले यसको नेतृत्व गर्दै आएको छ ।

अघिअघि गोरु, हली र बाउसे अनि पछिपछि रोपाहारले धान रोपेझैं रोपाइँको झल्को दिने अभिनयले स्थानीय मात्र नभएर टाढाबाट आएकालाई पनि मनोरञ्जन दिने गरेको छ ।

ताप्लेजुङमा नेवार जातिको बसोबास भएदेखि नै यो जात्रा थालिएको मानिन्छ ।

पछिल्ला वर्ष भने जिल्लाका सबै समुदायको पर्वका रुपमा लिइएको छ ।

यसले बर्खेबाली लगाएर बसेका आन्तरिक पर्यटक आकर्षित गरेको छ ।

जात्रामा रोपाहार, हली, बाउसेलगायत डेढ सय धेरै कलाकारले दिनभर अभिनय गर्ने गरेका छन । जात्राले लोपोन्मुख बन्दै गएको बेठीको झल्को दिने गरेको ज्येष्ठ नागरिकको अनुभव छ ।

जात्राका अवसरमा परम्परागत रुपमा चलिआएको लिम्बू जातिको धान नाच पनि देखाउने गरिएको छ । कोरोना संक्रमणबाहेक हरेक वर्ष रोपाइँ जात्रा जनै पूर्णिमाको द्वादशीका दिन गरिँदै आएको छ ।

यो वर्ष पूर्णिमा र गाईजात्रा एकैदिन परेकाले शुक्रबार रोपाइँ जात्रा गरिएको हो । तस्बिरः दिलकुमार लिम्बू