छापा संस्करण

ताप्लेजुङको फुङ्लिङमा आदिवासी जनजातिहरूको क्षमता विकासमा केन्द्रित दुई दिने तालिम सम्पन भएको छ। नेपालका पूर्वी पहाडी भेगमा वन, भूमि र जैविक विविधताको दिगो व्यवस्थापन प्रवर्द्धन गर्ने उद्देश्यसहित आयोजित यो तालिम “क्षमता अभिवृद्धि परियोजना (एफएलबि–इएच)” अन्तर्गत सञ्चालन गरिएको हो।

उक्त परियोजनालाई संयुक्त राष्ट्र संघीय खाद्य तथा कृषि संगठन ९एफएओ० मार्फत विश्व वातावरणीय सुविधा (जिइएफ) बाट प्राप्त अनुदान सहायता नेपाल सरकारले स्वीकार गरेको हो। सेवा प्रदायक संस्थाको रूपमा नेपाल आदिवासी जनजाति महासंघ (नेफिन)ले तालिमको आयोजना गरेको हो ।

जिल्ला कार्यक्रम संयोजक देवान सिं मादेनका अनुसार ताप्लेजुङका ३३ वडाबाट एक जना प्रतिनिधिलाई सहभागी गराई तालिममा समावेश गराइएको थियो। सहभागीहरूलाई क्षमता विकासमा केन्द्रित प्रशिक्षण प्रदान गरिएको मादेनले जानकारी दिए।

तालिममा नेफिनका परामर्शदाता हरी थलङले सहजीकरण गर्नुभएको थियो। सहभागीहरूलाई एफएलबि–इएच परियोजनाको परिचय, स्वतन्त्र, अग्रिम र सुसूचित मञ्जुरी ९एफपिक०, अन्तर्राष्ट्रिय कानूनी प्रावधानहरू, अन्तर्राष्ट्रिय श्रम संगठन महासन्धि १६९, एफपिकसम्बन्धी संवैधानिक एवं कानूनी प्रावधानहरू, एफपिक कार्यान्वयन प्रक्रिया, स्थलगत तथ्याङ्क संकलन तथा कार्ययोजना तर्जुमा लगायत विषयमा जानकारी दिइएको छ।

नेपालको पूर्वी पहाडी क्षेत्रमा संरक्षित क्षेत्रभन्दा बाहिर जैविक विविधता संरक्षण, दिगो जीविकोपार्जन प्रवर्द्धन तथा सुधारिएको पारिस्थितिक प्रणाली सेवाहरूको प्रवाह सुनिश्चित गर्न ताप्लेजुङ, तेह्रथुम, पाँचथर, इलाम र संखुवासभा जिल्लामा परियोजना सञ्चालनमा छ।