छापा संस्करण

ताप्लेजुङको सिरिजंघा गाउँपालिकामा खेबाङ गोल्डकपको सातौं संस्करण आयोजना हुने भएको छ। खेबाङ स्पोर्टिङ क्लबले शुक्रबार फुङलिङमा पत्रकार सम्मेलन गर्दै कात्तिक १० देखि १६ गतेसम्म प्रतियोगिता सञ्चालन हुने जानकारी दिएको हो।
प्रतियोगिता सिरिजंघा गाउँपालिका—७ खेबाङमा हुनेछ। क्लबका अध्यक्ष बिनम माबोका अनुसार, विजेताले एक लाख ५१ हजार १११ रुपैयाँ, उपविजेताले एक लाख १ हजार १११ रुपैयाँ नगद, ट्रफी, मेडल र प्रमाणपत्र प्राप्त गर्नेछन् । प्रतियोगितामा नेपाल पुलिस क्लब (कोशी प्रदेशं) रेड स्टार फुटबल क्लब (झापा), कुम्मायक गाउँपालिका (पाँचथर) लगायत जिल्लाका तेल्लो स्पोर्टिङ क्लब (तेल्लोक) लालीगुराँस स्पोर्टिङ क्लब (सुरुम्खिम), नैना कम्पनी प्रालि (खेबाङ), पेदाङ स्पोर्टिङ क्लब (पेदाङ), र आयोजक खेबाङ स्पोर्टिङ क्लबको सहभागिता रहनेछ।
खेल सञ्चालन गर्न करिब १५ लाख रुपैयाँ खर्च लाग्ने अनुमान गरिएको छ। सिरिजंघा गाउँपालिका, वडा कार्यालय खेबाङ, निर्माणाधीन जलविद्युत् परियोजनाहरू र अन्य दाताबाट आर्थिक सहयोग संकलन गरिने क्लबले जनाएको छ। २०६१ सालदेखि विजयादशमी र दीपावलीको अवसरमा खेलाइँदै आएको यो प्रतियोगिता २०७५ सालदेखि गोल्डकपको रूपमा आयोजना हुँदै आएको हो।