छापा संस्करण

ताप्लेजुङ, २८ वैशाख
नेपालको साहसिक पर्यटनले फेरि नयाँ उचाइ छोएको छ। ताप्लेजुङको गहना, कञ्चनजङ्घा हिमाल — विश्वको तेस्रो र नेपालको दोस्रो अग्लो चुचुरो — को सफल आरोहणसँगै नेपालले अन्तर्राष्ट्रिय पर्वतारोहण मानचित्रमा फेरि आफ्नो उपस्थिति कसम गरेको छ।

मे १० (वैशाख २७) मा दिउँसो २:१५ बजे, पाँच नेपाली र पाँच विदेशी आरोहीहरूको टोलीले ९,८५८.६ मिटर अग्लो हिमालको सफल आरोहण सम्पन्न गरे। सेभेन समिट ट्रेक, काठमाडौँको समन्वयमा सम्पन्न यस अभियानले केवल आरोहणको कीर्तिमान बनाएको छैन, ताप्लेजुङ र वरपरका स्थानीय अर्थतन्त्रमा पनि उत्साहको सञ्चार गराएको छ।

साहसिक यात्रा, साझा सहकार्य

यात्राको नेतृत्व र सुरक्षा सुनिश्चित गर्न नेपाली शेर्पाहरूको भूमिकालाई विशेष महत्व दिइएको छ। लाक्पा तेम्बा शेर्पा, निङ्मा दोर्ची शेर्पा, फुर सोना शेर्पा, ग्यालु शेर्पा र छाङ्वा शेर्पाको समर्पणबिना विदेशी आरोहीहरूको यात्रा सफल हुने थिएन।
विदेशी आरोहीहरूमा कुसुवोका फ्लुतुरम इब्राहिमी, बेलायतका एड्रियन माइकल हेस, इरानका अलिरेजा बेहपुर र सेइदमिदरजा हासेमी, तथा युएईका सइद अलमेमरी थिए।

यात्रा वैशाख २६ गते साँझ ६:१५ बजे चौथो शिविरबाट सुरु गरिएको थियो। यसअघि, एलिट एक्सपेड नामक अनुभवी शेर्पा टोलीले करिब ८,४०० मिटर उचाइसम्मको "फिक्सिङ लाइन" तयार पारेका थिए, जसले यात्राको मार्ग सुरक्षित बनायो।

कञ्चनजङ्घा क्षेत्र: केवल हिमाल होइन, सम्भावनाको भण्डार

यो वसन्तमा मात्रै ७० जनाले आरोहण अनुमति लिएकोमा हालसम्म १० जनाले मात्र आरोहण सम्पन्न गरेका छन्। बाँकी आरोहीहरू तयारीमा छन्।
यस तथ्यले स्पष्ट देखाउँछ—कञ्चनजङ्घा अब व्यावसायिक पर्वतारोहणको उदीयमान केन्द्र बन्ने दिशामा छ।

तर, यति मात्र पर्याप्त छैन। स्थानिय पूर्वाधारको कमजोरी, पर्यटन सूचना र प्रवर्द्धनको अभाव तथा दिगो व्यवस्थापन नीतिको आवश्यकता अझैँ पनि रहिरहेकै छ।
यदि समन्वय, लगानी र स्थानीय संलग्नतालाई प्राथमिकता दिइयो भने, कञ्चनजङ्घा क्षेत्रले स्थानीय युवालाई रोजगारी, कृषि र हस्तकलामा नयाँ बजार, तथा नेपाललाई विश्वकै अग्रणी साहसिक गन्तव्यको रूपमा स्थापित गर्न सक्छ।

नेपालको आह्वानः शिखर चुम, सम्भावना बुझ

कञ्चनजङ्घाको सफल आरोहण केवल हिमाल चढिएको क्षण होइन, यो नेपालका हिमाली समुदायहरू, पर्यटन व्यवसाय, र राष्ट्रको पहिचानको शिखर चुमिएको क्षण हो।

अबको प्रश्न यत्ति हो—हामी यसलाई कसरी अवसरमा रूपान्तरण गर्छौं?