छापा संस्करण

ताप्लेजुङमा आगामी चैत २३ गतेदेखि छैटौँ ताप्लेजुङ बज्रगुरु मन्त्रजप कार्यक्रम आयोजना हुने भएको छ। मुख्य आयोजक समितिले सदरमुकाम फुङलिङमा पत्रकार सम्मेलन गर्दै तीन दिने मन्त्रजप कार्यक्रमको जानकारी गराएको हो।

फुङलिङ नगरपालिका-९, सुकेटारमा हुने कार्यक्रम चैत २३ देखि २५ गतेसम्म सञ्चालन हुनेछ। भारतका प्रसिद्ध प्रमुख लामा कुन्दोलिङ ताक्छक रिन्पोछेको उपस्थितिमा मन्त्रजप गरिने समितिका सचिव पासाङ रिता शेर्पाले जानकारी दिनुभयो।

करिब २० हजार श्रद्धालु भक्तजनको सहभागिता रहने अपेक्षा गरिएको छ। सन् २०१६ (वि.सं. २०७३) देखि सुरु भएको कार्यक्रम कोभिड महामारीका कारण तीन वर्ष स्थगित भएको थियो।

कार्यक्रमको पहिलो दिन बिहान ७ बजेदेखि दिउँसो १ बजेसम्म मन्त्रजप तथा पूजा, मध्यान्ह १२ देखि ५ बजेसम्म प्रवचन तथा आगम प्रदान गरिनेछ। दोस्रो दिन पनि मन्त्रजप र प्रवचन रहनेछ भने अन्तिम दिन परम श्रद्धेय रिन्पोछेद्वारा प्रवचन तथा श्वेत ताराको आयु अभिषेक प्रदान गरिनेछ। साथै, कार्यक्रम अवधिभर बुद्ध भगवानको अस्तु धातु (रिङसेल) दर्शन गराइनेछ।

मन्त्रजपले मन शुद्ध गर्ने, पुण्य लाभ प्रदान गर्ने र बिघ्नबाधा हटाउँदै सुख-शान्ति तथा मनोकामना पूर्ति हुने विश्वास गरिन्छ।

कार्यक्रमका लागि अनुमानित ६० लाख रुपैयाँ खर्च हुने आयोजकको भनाइ छ। गत वर्ष ६८ लाख रुपैयाँ खर्च भएको थियो, जसमा स्टेज निर्माणमा मात्र १० लाख खर्च भएको थियो। १० वर्षसम्मका लागि सोही क्षेत्रमा कार्यक्रम गर्ने लक्ष्यअनुसार पूर्वाधार निर्माण भइसकेको हुँदा यस वर्ष कम खर्च हुने अपेक्षा गरिएको छ।

कार्यक्रम व्यवस्थापनका लागि भक्तजनबाट प्राप्त दक्षिणा नै मुख्य स्रोत हुने बताइएको छ। बिहानको खाना व्यवस्थापन गर्न ३५ हजार, बेलुकाको लागि ३० हजार तथा एक दिनको लागि १ लाख १० हजार रुपैयाँको दर तोकिएको छ।