छापा संस्करण

ताप्लेजुङको पाथीभरा-९ (मुक्कुमलुङ) क्षेत्रमा निर्माणाधीन केबुलकार परियोजनाविरुद्ध जारी विरोध थप सशक्त बन्दै गएको छ। ‘नो केबुलकार’ पक्षले आफ्नो आन्दोलनलाई नयाँ चरणमा प्रवेश गराउँदै अनिश्चितकालीन यातायात बन्दसहितको कार्यक्रम सार्वजनिक गरेको छ।

मुक्कुमलुङ तान्सेप चुम्भो र मुक्कुमलुङ संरक्षण अन्तरदीलय सङ्घर्ष समितिको अगुवाइमा जारी आन्दोलन अन्तर्गत, विरोधका कार्यक्रमहरू क्रमशः जनसभा, आमसभा, अनशन, र सडक अवरोधसम्म विस्तार गरिएका छन्। उनीहरूले मुक्कुमलुङ संरक्षण तथा केबुलकार परियोजना खारेजीको माग गर्दै संवादको ढोका खुला राखेपनि सरकारलाई दवाव दिन चरणबद्ध आन्दोलन अघि बढाउने जनाएका छन्।

आन्दोलनका प्रमुख कार्यक्रमहरू

फागुन २८: काठमाडौँमा बुद्धिजीवी भेला गरी आन्दोलनको औपचारिक सुरुवात।
चैत २: राजनीतिक दल, प्रदेश तथा सङ्घीय सांसदहरूलाई आन्दोलनको औचित्यबारे जानकारीपत्र हस्तान्तरण।
चैत ३: व्यवस्थापिका, कार्यपालिका, न्यायपालिकालाई आन्दोलनबारे जानकारी गराउँदै फुङ्लिङमा रिले अनशन।
चैत ४-१२: संरक्षण अभियान अन्तर्गत अगुवा कार्यकर्ताहरूको भेला, छलफल तथा एसियन हाइवे बन्दजस्ता गतिविधि।
चैत ६: अन्तर धार्मिक समन्वय भेला, सिंहदरबार घेराउ।
चैत ७-८: अन्तर्राष्ट्रिय समुदायलाई आन्दोलनबारे अवगत गराउँदै फोटो प्रदर्शनी।
चैत ९-११: लहान, जनकपुर, लालबन्दीमा जनप्रदर्शन तथा साहित्यिक कार्यक्रम।
चैत १५-२२: कोशी प्रदेशका १४ जिल्लामा जनचेतना अभियान, घाइते तथा पक्राउ परेकासँग भेटघाट।
चैत २४: पूर्वी नेपालका १४ जिल्लामा जनप्रदर्शन।
चैत २५ देखि: कोशी प्रदेशभर अनिश्चितकालीन यातायात बन्द।

आन्दोलनकारीहरूले फागुन १० मा फुङ्लिङमा भएको घटनाबारे अन्तर्राष्ट्रिय समुदायलाई जानकारी गराउने घोषणा गरेका छन्। साथै, पक्राउ परेका तथा वारेन्ट जारी गरिएका अभियन्ताहरूको नाम सार्वजनिक गर्ने योजनामा छन्।

यो आन्दोलनले ताप्लेजुङको विकास परियोजनामा नयाँ मोड ल्याउने अनुमान गरिएको छ। एकातिर, केबुलकार निर्माणले पर्यटन प्रवर्द्धन गर्ने पक्षधरहरू छन् भने अर्कातिर, स्थानीय सम्पदा तथा वातावरणीय प्रभावलाई लिएर चिन्ता व्यक्त गर्ने समूहको दबाब बढ्दै गएको छ। सरकार र सरोकारवालाबीचको वार्ताले यो विषयलाई कसरी सम्बोधन गर्छ भन्ने अबको प्रतीक्षा रहनेछ।