छापा संस्करण

सुबाश राई समिप फालेलुङ, पाँचथर।

पाँचथरको फालेलुङ गाउँपालिका–३ र ४ नम्बर वडाको संगमस्थल थाप्ली डाँडा सिर्लिङ्गी टारमा दोस्रो फालेलुङ पर्यटन महोत्सव चैत १८ देखि २३ गतेसम्म आयोजना हुने भएको छ। मंगलबार फिदिममा आयोजित पत्रकार सम्मेलनमा आयोजक तीन सिमाना जनसेवा समाज नेपाल, मेमेङले महोत्सवबारे जानकारी गराएको हो।

समुन्द्र सतहबाट करिब ३,००० मिटर उचाइमा रहेको यस महोत्सवको मुख्य उद्देश्य आन्तरिक तथा बाह्य पर्यटन प्रवर्द्धन गर्नु रहेको आयोजकले जनाएको छ। यस क्षेत्रबाट सगरमाथा, कञ्चनजङ्घा, कुम्भकर्ण, मकालु लगायतका हिमालहरूको मनोरम दृश्य अवलोकन गर्न सकिन्छ। साथै, यहाँ पाइने दुर्लभ वन्यजन्तु हाब्रे (रेड पाण्डा) तथा बहुमूल्य जडीबुटीका कारण जैविक विविधताको हिसाबले पनि महत्वपूर्ण मानिन्छ।

महोत्सवमा विभिन्न प्रतियोगिता तथा मनोरञ्जनात्मक कार्यक्रमहरू समावेश गरिनेछन्। पहिलोपटक ८ किलोमिटर लामो साहसी म्याराथन प्रतियोगिता आयोजना गरिनेछ, जसमा दौडथुन थाप्ली हुँदै तीन सिमाना परिक्रमा गरी पुनः थाप्लीमै समापन हुनेछ। फुटबल, डोरी तान्ने, घोडा दौड (रेस), याक राइडिङ लगायतका खेलकुद प्रतिस्पर्धा रहनेछन्। महोत्सवको समापनका दिन चर्चित गायिका बबिना किरातीले विशेष सांगीतिक प्रस्तुति दिनेछिन्।

स्थानीय तथा परम्परागत परिकार प्रवर्द्धनका लागि विशेष स्टलहरू रहनेछन्। रैथाने खानेकुरा जस्तै याङ्बेन, गुराँसको रक्सी, चौरीको घ्यू, छुर्पी, भेडाको उनबाट बनेका आसकोट, भेडाको घ्यू, मालिङ्गोको चोयाबाट निर्मित डालो–डोको, साथै विभिन्न चित्रहरूको प्रदर्शनी गरिनेछ।

फालेलुङ गाउँपालिकाका विभिन्न स्थान पछिल्लो समय आन्तरिक तथा बाह्य पर्यटकका लागि आकर्षणको केन्द्र बन्दै गएका छन्। गाउँपालिका अध्यक्ष वीर विक्रम थाम्सुहाङका अनुसार पर्यटनलाई रोजगारीको स्रोतका रूपमा विकास गर्दै स्थानीय स्तरमै आयआर्जन वृद्धि गराउने लक्ष्य रहेको छ।

महोत्सवको समापन समारोहमा भौतिक पूर्वाधार तथा यातायात मन्त्री भुपेन्द्र राईको उपस्थिति रहने आयोजक सचिव गणेश थाम्सुहाङले जानकारी दिए। महोत्सवमा पाँच हजारभन्दा बढी दर्शक तथा पर्यटक सहभागी हुने अपेक्षा गरिएको छ।

फालेलुङ गाउँपालिकाले महोत्सवका लागि ५ लाख रुपैयाँ बजेट विनियोजन गरेको छ भने आयोजकका अनुसार महोत्सव सञ्चालन खर्च ८ लाखभन्दा माथि पुग्ने अनुमान गरिएको छ। गत वर्ष मंसिर २७ देखि तीन दिनसम्म आयोजना भएको महोत्सव यसवर्ष चैत महिनामा मात्र आयोजना गर्न लागिएको हो।

फालेलुङ गाउँपालिकामा हरेक वर्ष तीनवटा प्रमुख महोत्सव आयोजना हुने गर्छ। सन् २०७४ देखि वैशाख १ गतेदेखि चौरी पर्यटन महोत्सव सञ्चालन हुँदै आएको छ भने वाङ्मय प्रतिष्ठानले सांस्कृतिक महोत्सवसमेत आयोजना गर्दै आएको छ। यी महोत्सवहरूले स्थानीय कला, संस्कृति तथा पर्यटन प्रवर्द्धन गर्न महत्वपूर्ण योगदान पुर्‍याइरहेका छन्।